Condt sij eenen iegelijcken dat comen sijn voer ons
scepenen ondergescreven Meeus Peter Meeus soen ter eenre, ende Cornelis, Willem,
Jan, ende Peter zoen wilner (wijlen) Wouter Vermee als gerechte voecht ende
momber van Aert noch onmondich zoen daer hij Peter voers voer instaet ende
geloeft heeft ende Magarijet ende Elijzabet cum tutore (met hun voogd) allen
wettige kijnderen Meeus Peter Meeus zoen voers die hij Peter voers verweckt ende
vercregen hadde in eenen wittigen bedde bij wilner (wijlen) Marij sijn wittige
huijsvrou dochter wilner Peter Willem Gerits ter andere sijden ende hebben onder
hen bij rade van sommijgen hunen vrijenden ende magen een erffdeijlinge ende
erffsceijdinge gemaeckt ende gedaen van sommegen hune erffgoeden hijer nae
beschreven
Overmijdts welcke
erffdeijlinge ende erffsceijdinge wille soe sal Meeus Peter Meeus voers hebben
houwen ende tot sijne erffelijcheijt in tochte besitten het huijs gelegen aen
die Hoeven met halff der erffe gelegen aent voers huijs gelegen inde parochie
van Tilborch ter plaetse geheijten aen die Hoeven voers tussen erffe Jan Peter
Gijben soen deen sij ende tussen erffe Cornelis zoen Meeus Peter Meeus voers dat
hijer tegen gedeijlt is dander sij hodende metten eenen eijnde die kijnderen
Aerts van Riel ende metten anderen eijnde aen die gemeijnen straet Noch hijer
toe een stuck landts alsoe groot ende cleijn alst aldaer gelegen is gelegen inde
parochie van Tilborch voers ter plaetsen geheijten in die Tetenbraeck tussen
erffe die kijnderen Aerts van Riel deen sij, ende deen einde, ende tussen erffe
Jan Peter Gijben dander sij, hodende metten anderen eijnde aen erffe Claes
Steven Reijnen soen, Noch hijer toe die helft in derdalff lopensaet landts
gelegen in der parochie voers ter plaetse geheijten in die Tongerloesche hove
tussen Daem Wouters cum alijs (met anderen) deen sij, ende tussen erffe Jan soen
Meeus Peter Meeus voers dat hijer tegen gedeijlt is dander sij, hodende metten
eenen eijnde aen erffe Jan Gherit Eijssen zoen ende metten anderen eijnde aen
erffe Jan zoen Meeus Peter Meeus voers dat hijer tegen gedeijlt is Noch hijer
toe een halff mud rogge jaerlijcke ende erffelijcken pacht alle jaer gelden ende
te betalen op Onser Lieve Vrouwe dach Lichtmisse waer van den iersten pacht
verschijnen ende vallen sal van Lichtmisse nu naest comende over een
jaer wuijt ende van eenen stuck erffs vier loepensaet vel circiter (of daar
omtrent) begrijpende gelegen inde parochie voers ter plaetsen geheijten in
Sterts Hoeffe tussen erffe Cornelis die Beer deen sij, ende tussen erffe Peter
zoen wilner (wijlen) Peter Wouters voers dander sij hodende metten eenen eijnde
aen erffe Henrick zoen wilner (wijlen) Cornelis Appels zoen ende metten anderen
eijnde aen die ghemeijnen straet Noch hijer toe een halff mud rogge erffpachs
het welck jaerlijcks geldende is Henrick Jans van der Mee ut patet in literis de
Tilborch (zoals blijkt uit brieven van Tilburg), Noch hijer toe negen lopen
rogge erffpachs op Arijaen Meeus ut patet in literis de Tilborch (zoals blijkt
uit brieven van Tilburg) Noch hijer toe een halff mud rogge erffpachs op die
kijnder Wouter Goeijens nae inhout scepenen brijeven van Tilborch, Noch hijer
toe een halff mud rogge erffpachs op de weduwe Jan Sijmons nae inhout scepenen
brijeven van Tilborch Noch hijer toe vier loepen rogge erffpachs op Henrick
Appels nae inhout scepenen brijeven van Tilborch alsoe sij dit altemael zeden,
op welck huijs met allen den voers helften vande erffe voers ende oeck metten
erffpachten voers dese voers kijnden altesamen wittelijcken ende erffelijcken op
vertegen hebben tot behoeff Meeus Peter Meeus hunnen vader voers ende hebben
oeck geloeft dese voers kijnde altesamen ende elck inde naem als voers debitors
principales super ae pus habita dit opdragen overgeven affgaen ende
vertijen Meeusen hunnen vader voers altijt vast ende stendich te houen ende in
hunnen naem te doen houen sonder enijch wederseggen ende elck commer van sijnre
wegen aff te doen den selven waer wuijt Meeus voers jaerlijcks sal gelden ende
betalen ende geloeft heeft te gelden ende te betalen eenen jaerlijcke ende erffe
pacht van derthijendalff lopen rogge aende Heijlige Gheest in Tilborch Noch
hijer toe jaerlijcks te betalen eenen erff pacht van achtalleff loepen
rogge te betalen daer men se met recht sculdich is te betalen Noch hijer
toe een erffschijns van eenen halven stuijver te betalen aen den heer van
Tilborch op Sinte Stevens dach Noch hijer toe een halff oirt stuijver
erffschijns aen die gezworen van Tilborch te betalen datum den xii februarij scabini Vet ende
Leemans
Hijer
tegen soe sullen dese voers kijnderen hebbe houwen ende tot hoere erffelijcheit
besitten inde iersten soe sal Cornelis Meeus voers hebben houwen ende voer sijn
gedeelt erffelijcken besitten die heelft van der aensteden alsoe groot ende
cleijn als dat aldaer gelegen is gelegen inde parochie voers ter plaetse
gehijten aen die Hoeven tussen erffe Jan Gerit Eijssen zoen cum alijs (met
anderen) deen sij, ende tussen erffe Meeus sijn vader metten helft hijer
tegen gedeijlt dander sij hodende metten eenen eijnde aen erffe die kijnderen
Aert van Riel, ende metten anderen eijnde aen die ghemeijne straet, Noch soe sal
Cornelis voers hebben ende houden die een helft vande schuer het eijnde ter
straten waert staende opt erve voers Noch soe sal Cornelis voers hebben die een
helft vande appelbomen staende op sijns vader erve voers het profijt daer van
sijn vader leve lanck ende nae doot vande vader voers soe sal Cornelis die helft
vande erff trecken alsoe hij zede wuijt welcken gedeelt Cornelis voers
jaerlijcks sal gelden ende betalen derthijendalleff lopen rogge erffpachs te
betalen .... Tilborch, Noch hijer toe te betalen eenen erffschijns van
eenen oirt stuijver, noch hijer toe een halff oirt stuijver erffschijns te
betalen aen die gesworen van Tilborch
Hijer tegen soe sall Willem Meeus voers hebben houwen ende
voer sijn portie ende gedeelt besitten een stuck erffs alsoe groot ende cleijn
alst aldaer gelegen is gelegen inder parochie van Tilborch ter plaetsen
geheijten die Lijnde tussen erffe Gherit Jan Gijben zoen aen beijde sijden
hodende metten eenen eijnde aen erffe die kijnderen Wouter sBonten ende metten
anderen eijnde aen die gemeijn straet Noch soe sal Willem voers hebben eenen
acker landts geheijten den Valen Acker in alder grooten als hij aldaer gelegen
is gelegen inder parochie voers tussen erffe die kijnderen Peter Zegers deen sij
ende tussen erffe Henrick Cornelis Appels dander sij, hodende metten eenen
eijnde aen erffe die kijnder Gheen Hagerts ende metten anderen eijnde aen die
ghemeijnt van Tilborch alsoe hij zede wuijt welcke gedeelt voers Willem voers
jaerlijcks sal gelden ende betalen eenen jaerlijcken ende erffelijcken pacht van
verthijen lopen roggen ende ten Bosch te leveren, Noch hijer toe een erffschijns
van een oirt stuijver, ende noch over dese voers erffe te wegen die gene die
daer met recht sculdich sijn over te wegen,
Hier tegen soe sal Jan zoen Meeus Peter Meeus hebben houwen
ende voer sijn portie ende gedeelt erffelijcken besitten een stuck erffs drie
lopensaet off all soe groot ende cleijn alst aldaer gelegen is gelegen inde
parochie van Tilborch ter plaetsen geheijten in die Tongerloesche Hoeff
tussen erffe Meeus Peter Meeus zoen sijn vader dat hijer tegen gedeijlt is
deen sij ende tussen erffe Peter Wouter Zewerts dander sij hodende mette eenen
eijnde op erffe des Convents van Tongerloe ende metten anderen eijnde op erffe
Jan Gherit Eijssen zoen als hij zede, wuijt welcke stuck erffs ende gedeelt Jan
voers Jaerlijcks sal gelden ende betalen aende heer van Tilborch op Sinte
Stevens dach eenen halve stuijver erffschijns Noch hijer toe laerlijcks te
gelden ende te betalen derhalff oirt stuijvers erffchijns te betalen aen die
gezworen van Tilborch Noch hijer toe een oirt stuijver erffschijns te betalen
daer met recht sculdich is te betalen, en noch hijer over te wegen die daer met
recht sculdich sijn over te
wegen
Hijer tegen soe sal Elijsabeth dochter Meeus Peter Meeus
soen voers hebben houwen ende voer haer portie ende gedeelt erffelijcken
besitten een stuck erffs vier lopensaet of alsoe groet ende cleijn als dat
aldaer gelegen is gelegen inder parochie van Tilborch ter plaetse geheijten in
Sterts Hove geheijten Trijen Acker tussen erffe Peter Wouter Vermee deen sij,
ende tussen erffe Cornelis die Beer dander sij hodende metten eenen eijnde aen
erffe Henrick Cornelis Appels, ende metten anderen eijnde aen die gemeijne
straet, als sij zede, wuijt welcke stuck erffs ende gedeelt voers sij Elijzabeth
voers jaerlijcx sal gelden ende betalen aen Meeusen hoer vader voers eenen
erffpacht van eenen halve mud rogge, welck half mud rogge erffpachs voers
Elijzabeth voers aff lossen ende quijten mach nae der doot van Meeussen haer
vader tot haeren scoensten altijt met die ... van twentich Rijnsche gulden xx
stuijvers het stuck, welcke halff mud rogge met desen onderpande voers voer inde
deijlinge van Meeusen haer vader .. ende oeck benoempt staet Noch hijer
toe jaerlijcx te gelden een oirt stuijver erffschijns ende dat te betalen daer ment met recht
sculdich is te betalen
Hijer tegen soo sullen sij Aert ende Margarijet kijnderen
Meeus Peter Meeus voers te samen hebben houwen ende voer hun portie ende gedeelt
erffelijcken besitten, een stuck erffs een lopensaet vel circiter (of daar
omtrent) begrijpende gelegen inder parochie voers ter plaetsen in die Schijve
tussen erffe die kijnderen Aerts van Riel deen sij, ende tussen erffe Willem
Arijaen Mutsaerts dander sij ende oeck deen eijnde, hodende metten anderen
eijnde aen die ghemeijne straet geheijten die Vlasstraet Noch hijer toe een
stuck erffe derdalleff lopensaet off alsoe groot ende cleijn als dat aldaer
gelegen is gelegen inde parochie ende ter plaets voers tussen erffe Laureijs
Henrick Lemmens cum alijs (met anderen) deen sij ende metten andere sijde aen de
ghemeijne waterlaet hodende metten eenen eijnde aen erffe Jan die Vet Noch hijer
toe een stuck erffs vier lopensaet off allsoe groot etc gelegen inde parochie
ende ter plaetsen voers gelegen metten eenen eijnde aent tselve voers stuck
erffs gelegen Jan Michiel Roeloffs deen sij, ende tussen erffe Laureijs Henrick
Lemmens cum alijs (met anderen) dander sij, hodende metten anderen eijnde aen
erffe Claes Steven Reijnen zoen, alsoe zij zeden waer wuijt sij Aert ende
Margariet voers tsamen laestelijcks sullen gelden ende betalen eenen halve
stuijver erffschijns ende dien te betalen daer ment met recht sculdich is te
betalen, op welcke erffenissen gedeelten ende erffpachten voers Meeus Peter
Meeus zoen voers wijttelijcken ende erffelijcken vertegen heeft tot behoeff
sijnder kijnderen voers ende heeft geloeft Meeus voers ut debitor principalis
super se et bona sua (als hoofdschuldenaar op zich en zijn goederen) dit
opdragen overgeven affgaen ende vertijen altijt vast ende stendich te houden etc
ende commer van sijnre wegen aff te doen den selve, ende hebben oeck noch
geloeft deese voers kijnderen voers die een den ander als principael sculder op
hen ende allen hen goeden die sij nu hebben ende naemaels hebben ende vercrijgen
moege dat elck bij sonder sijn consent in deser deijlinge hem toegevoecht sijnde
alsoe jaerlijcks sal gelden ende betalen datter die andere goeden hijer tegen
gedeijlt sijnde daer aff sullen blijven ongehouden ende onbelast nu ende ten
ewijgen dagen sonder argelist ende is oeck noch ... off tot enijgen toecomende
tijd enijgen commer quame op ijemants gedeelt ende hem in deser erfdeijlinge
nijet benoempt en waer alsulckx commer alsoe comende hebben sij deijlsluijden
voers die een den ander geloeft kijndts kijndts gelijck te helpen gelden
ende dragen datum et scabini ut supra.