Kennelijck zij eenen ijegelijcken dat voir ons schepenen
ondergeschreven inne propren personen sijn gecomen ende gecompareert Peeter sone
wijlen Henrick Hermanssoon van Heijst ende heeft bekent bekennende mitsdsen
wettelijck ende erffelijck ... ende overgegeven te hebben ten behoeve van
Cornelisen sone wijlen Henrick Hermanssoon van Heijst deene hellicht in alsulcke
obligatie van vijff hondert carolus gulden daeraff Adriaen Cornelissoon Keijser
van wegen den dorpe van Tilborch obligatie ... tsamen met allen den
achterstelle daeraff onbetaelt staande ende alnoch heeft die voirschreven Peter
wettelijck ende erffelijck overgegeven aen voirgenoemde Cornelisen sijnen
broeder deene helft van een stuck erven tot saijlandt ende weije liggende int
geheel ses lopensaet metter mate begrijpende gelegen binnen die prochie van
Tilborch ter plaetschen geheijten inde Hasselssche ackeren aldaer tusschen
erffenisse Bartholomeus Jan Hendricx aen deen sijde, ende tusschen erffenisse
Jan Herman Cornelissoon doude dander sijde, streckende vander gemeijnder strate
totter erffenisse Peeter Adriaenssoon van Gilse met de weduwe Jan Jan
Danielssoon van Beurden doude metter kijnderen ende heeft die voirschreven
Peeter hieroppe volcomentlijck vertegen ten behoeve van Cornelisen sijnen
broeder voirschreven die dandere hellicht hierinne is toebehoirende met affgaen
ende vertijen als dat gewoonlijck ende recht is, gelovende die voirschreven
Peter super se et bona dese hellicht in het voirschreven stuck erven te waren
alsmen los ende vrij erven schuldich is te waren ende dese ... overgeven
affgaen ende vertijen altijt vast ende stentich te houden ende in sijnen name te
doen houden sonder ennich wederseggen, ende allen commer ofte calangie daerop
comende altemael aff te doen den selven vuijtgenomen dat die koper vuijt deene
hellicht van dit stuck erven sal gelden deene hellicht van ii oirt stuijvers
cijns aende heere van Tilborch op Sinte Stevens dach te betaelen .... is
mitsdesen ... ende opdracht van waerden dat die voirschreven Cornelis sal moeten
betalen ende voldoen alsulcken ... negen hondert Carolus guldens aent
Gasthuijs binnen s'Hertogenbosch te betalen daeraff den voirschreven Peeter ende
Cornelis tsamen ... tot Sint Michielsdach ... jaerlijx ende daer voirens
vervallen dat die voirschreven Peeter sijne erven of nacomelingen daeraff nijet
sullen werden gemaeckt of gemolesteert in ennicher maniere welcke die
voirschreven Cornelis gelooft heeft te ... daervoire oock sijnen persoon ende
alle sijne goeden hebbende ende vercrijgende verbijndende dach xvii februarij 1624 scabini Bardwijck et Kivits.