Placcaet ende Ordi-
nantie ons Heeren des Conincx / Om die Plun-
deringhe / pillerye / scheyndinghe ende bederffe-
nisse vanden Kercken / Cloisters ende Godthuy-
sen te verhoeden ende remedieren. Ende
teghens die Beroerte ende commotie
vanden volcke in desen Ne-
derlanden ordene te
stellen.
Met previlegie van heure Hoocheyt.
Gheprint inde Stadt van Bruessele / by Michiel van
Hamont / ghesworen Boeckprinter / woonende op
of Pongelmerct / oft onder het Stadthuys.
M.D.LXVI
LA DVCESSE de Parme & de Plaisance,
Regente & Gouvernante pour le Roy
nostre Sire es Pays depardeça, defirant que
les Lettres de Placcart de sa Maiesté, du vingtcincquiesme
de ce mois despeschees sur le Faict des Saccaigemens
des Temples, Eglises & Monasteres, contenant
aussi defence du port des Armes, soyent incontinent
divulguees par tous cesdits Pays, affin que chacun
se puisse rigler selon le contenu d'icelles. A ordonné
& permis, ordonne & permet par cestes à Michiel
de Hamont Imprimeur juré en ceste ville, d'imprimer
lesdictes Lettres de Placcart, en telle forme & langaige
qu'elles ont esté faites & expedices, deffendant à
tous aultres de les imprimer ou vendre d'autre impression,
A paine de confiscation d'icelles, au prouffit
dudit Hamont. Fait à Bruxelles le vingtsixiesme iour
d'Aoust XVc. Soixante six.
MARGARITA,
Par ordonnance de son Alteze.
D'Overloepe.
ONsen Lieven ende ghetrouwen den Cancellier ende Luyden van onsen Rade in Brabant / Saluyt ende dilectie. Alsoe eenighe oproerighe ende seditieuse menschen / wederspannighe ende Sectarijsen / mit groote stouticheyt ende verwaentheyt / hen alreede vervoirdet hebben / vele ende verscheyden Kercken / Cloisteren, ende Godshuysen in onsen Landen van Herwaertsovere mitgaders de Boecken aldaer zijnde te verbernen / bederven / berooven ende plunderen / Ende dat ergher is het hooch weerdich heylich Sacrament des aultaers zeer onweerdelijcken te handelen ende tracteren. Oick de beelden ende representatien vanden heylighen Cruyce / Santen / Santinnen / ende andere gewijde ende gesacreerde dinghen af te breken / scheuren ende vernielen / Tot groote versmadenisse ende offensie van onsen Heere God / ende oick tot geheele confusie ende generaele bederffenisse vanden gemeynen Staet van Herwaertsovere / soe verre daerinne by alle ghevuechlijcke middelen in tijts niet voersien en worde. Soe eest: dat wy tselve aengemerct / ende begheerende daerinne promptelijcken remedie provisionael te stellen / Hebben mit rijpe deliberatie van rade / ende by advijse van onse seer lieve ende seer beminde sustere / die Hertoginne van Parme ende van Plaisance voer ons Regente ende Gouvernante in onsen voers landen van herwartsovere: Ende van onsen seer lieven ende ghetrouwen Ridders van onser ordene / ende luyden van onsen Raden van State / ende secreten / neffens haer wesende / Verboden ende gheinterdiceert / verbieden ende interdiceren wel ernstelijcken allen ende eenen yeghelijcken int besundere / eenighe Kercken / Cloisteren oft andere Godshuysen in onsen voirseyden Landen van herwartsovere / te berooven / plunderen / pilleren / bederven / oft verbranden directelijck oft indirectelijck. Oft daer toe eenighe hulpe oft bystant te doen by hen selven oft by anderen mit hueren wete / oft yet van daer te draghen oft nemen / Op pene van der Galghe / ende van consfiscatie van goede / daer Confiscatie stadt grijpt. Verclarende sulcke luyden voir Kerckscheynders oft Roovers / openbare Diefven / vyanden van God / van ons / ende vanden Lande: De welcke wy eenen yeghelijcken toelaeten / doot te slaen / niet alleenlijcken vrijelijcken ende sonder punitie / maer oick met loffprijs ende eere / ghelijck men doet ende useert teghens den ghemeynen vyanden vanden lande / ende openbaere grassateurs. Voirtsmeer ordineren ende statueren wy by desen / dat alle ende eenyeghelijck van wat conditie oft qualiteyt die wesen moghen / niet alleenlijck Officiers / ende wethouders / maer oick Edelmans / Poorters / Borghers ende inghesetene / mitgaders alle andere particuliere persoenen / die vande voirs cracht / overlast ende ghewelt sullen weten te spreken / oft de selve sullen sien doen ende committeren / ghehouden sullen worden terstont ter hulpen ende weere te loopen: Ende met alle heure macht beletten de plunderinghen ende pilleryen vanden voirs Kercken / Cloosters ende Godshuysen / Op arbitrale pene teghens den Officiers ende wethouders / soe wel int generael / als int particulier. Welcke pene insghelijcx stadt grijpen sal teghens alle andere die daerby ende iegyenwoirdich zijn / ende gheen debvoir doen en sullen / om de voirseyde cracht / gewelt ende overlast te beletten / ende verhoeden. Oick op pene voir ende aengaende den steden / aldaer die wethouders hen hierinne niet quijten en sullen / ende t'lichaem oft de ghemeynte van dien daerinne consenteert / van hun Previligien te verliesen ende verbeuren. Willende dat van ghelijcken ghedaen ende gheobserveert worde: Indien men particuliere persoenen oick eenighen overlast oft ghewelt dade. Daerenboven om t'volck alomme soe oproerich wesende / huere wapenen af te doen legghen soe verbieden ende interdiceren wy insghelijcx / allen persoonen hoedanich die wesen moghen / in eenighe vergaderinghen met eennighe invasible wapenen te commen / oft de selve te draghen / tzij binnen oft buyten den Steden / dan alleenlijcken de ghene die de selve by publijcke auctoriteyt als wesende Officiers / oft oirlochsvolck ende ter saken van heuren officien moeten draghen. Op pene daer van ghestrafft ende ghepunyeert te wordden / als wederspannighe / rebelle / oproerich / seditieulx ende perturbateurs vander ghemeyne ruste / tzy metter doot / oft mit anderen ertraordinaryse penen / nae den eysch / ghelegentheyt ende circomstantie vander saken / T'welck wy by de Auctoriteyt vande Gouverneurs / volghende den last die wy hen deshalven ghegeven hebben / mitgaders vanden Officiers / Wethouders / Capiteynen / oirlochsvolck / ende alle mogelijcke middelen willen gheeffectueert / volcommen ende rigoreuselijcken gheexecuteert te worden / Op pene van tselfde (inghevalle van negligentie) op hen te verhalen. Ende ten eynde dat van onse teghenwoirdich Verbot, interdictie ende Ordinancie / niemant ignorantie en soude mogen pretenderen / soe ontbieden ende bevelen wy u wel scherpelijcken / dat ghy de selve terstont ende sonder vertreck / doet kundighen / vuytroepen ende publiceren / alomme binnen den Steden ende plaetsen van onsen Lande ende Hertochdomme van Brabant / ende van Overmaze / daert van noode wesen sal / ende men ghewoonlijck is Vuytroepinghen ende publicatie te doene: Ende tot onderhoudenisse ende observatie van diere / procedeert ende doet procederen teghens den overtreders ende ongehoirsame by executie vande Penen boven verclaert / Sonder eenige gratie / gunste / dissimulatie oft verdrach. Des te doene mit diesser aencleeft / gheven wy u / mitgaders den voirs Officiers ende wethouders / volcommen macht / auctoriteyt / ende sonderling bevel. Ontbieden ende bevelen voirts eenen yeghelijcken dat sy u / ende hen sulcx doende / ernstelijck verstaen ende obedieren. Want ons alsoe ghelieft. Ghegheven in onser Stadt van Brueselle onder onsen Contreseghel hierop ghedruckt in Placcate / den Vijfventwintichsten dach van Augusto / XVc. Sessentsestich.
Byden Coninck /
In sijnen Rade.
D'Overloepe.
Ghelijcke Brieven van Placcate zijn gheexpedieert ende ghesonden gheweest in alle dandere Landen van Herwaertsovere.